Әлеуметтік желіде наразылық акциясының видеосы тарады.
Алматыда балаңды шетелге оқуға түсіремін деген орталыққа алданған ата-аналар ереуілге шықты, деп хабарлайды Almaty-akshamy.kz
Алматыда қаласында орналасқан, шетелге оқуға түсірумен айналысатын “Zeyn qoi” орталығының алдына бір топ ата-ана жиналды.
“Бір жыл бұрын ұлым Zeyn qoi жарнамасын көріп, шетелге түсуге дайындалу үшін осы мектепке оқуға түстік. Банктен несие алып, барлық соманы екі жылда төледік, шарттары осындай болды. Біраз уақыттан кейін ұйымның Foundation сертификаты жоқ екенін білдік, ал онда сабақ беретін ұстаздар университетті енді ғана бітірген қарапайым студенттер, яғни ұстаздық тәжірибесі жоқ екені белгілі болды. Сонымен қатар бір жыл бойы мұғалімдер мен кураторлар екі-үш ай сайын ауысып отырды. Бізге, ата-аналарға балалардың оқуы туралы ешқандай мәлімет берілмеді”, -дейді наразы ата-аналардың бірі өз жазбасында.
Ата аналар осыдан 6 ай бұрын орталықтың басшысы барлық мәселелерді шешуге уәде бергенін айтады.