Ахмет Байтұрсынұлының музей-үйі Алаштың қара шаңырақтарының бірі.
Былтыр Ахмет Байтұрсынұлының 150 жылдық мерейтойына тарту ретінде Ұлт ұстазының туған өлкесінен Анадолы жұртына дейін 5555 шақырымдық велошеруді 55 күнде жалғыз жүгіріп өткен велосаяхатшы, журналист, рекордсмен Ернат Мелсұлы Алматыдағы «Ахмет үйіне» сәлем бере келді, деп хабарлайды Almaty-aqshamy.kz
Ол өзінің жанкүйерлерімен жүздесіп, велошерудің барысын баяндап берді.
Алаш арыстарының рухын ту еткен патриот азаматпен кездесуге бірқатар зиялы қауым мен БАҚ өкілдері, дәстүрлі өнерді насихаттаушы өнерпаздар қатысты.
Ернат Мелсұлы былтырғы велошеруін 5 қыркүйек күні, яғни Ұлт ұстазының туған күнінде Торғай жеріндегі Ақкөл, Сартүбектен бастаған. Каспий мен Қара теңізді жағалап, Қап тауларын сағалап, Анадолы түбегін аралап, 55 күнде 5555 шақырым жолды басып, сапарын Стамбулда тамамдаған.
Ернат Мелсұлы 2018 жылдан бері түрлі велошерулер жасап, Қазақстанда екі мәрте рекорд жасаған. Соның бірінде, былтыр ақпан айында Ұлт ұстазының мерейтойына орай өзі ұйымдастырған қысқы велошеруде Ернаттың есімі “КинЭС” рекордтар кітабына енген болатын. Ол жанкешті жиһангез ғана емес, журналист, әрі оқытушы, аудармашы. «Ағылшынша тіл сындыру» кітабының, Qazaq English, «Ағылшын – ауыл үшін», «Абай арқылы ағылшынша үйрен», «Ғылым тап - Find Science», «Толық адам және 4 даму» жобаларының авторы.
Арнайы «Ахмет үйіне» сәлем бере келген Е.Мелсұлы бір жасқа толған қызының туған күнін де киелі ордада қарсы алуды көздегенін айтты. Былтыр А.Байтұрсынұлының мерейтойы қарсаңында туған, әрі мерейтойға арнаған велошеруінің жеңісіне тәңірінің сыйлығы сынды дүниеге келген қызына Ұлт ұстазының аяулы жары Бадрисафа Мұхамедсадыққызының есімін берген екен. «Ахмет үйіндегі» жылы жүздесуден кейін кішкентай Бадрисафаның тұсаукесері Ұлт ұстазы өмірінің соңында тұрған киелі орданың үлкен залында өтті.
Кездесу барысында Е.Мелсұлы Ахмет Байтұрсынұлы ғана емес, өзге де Алаш арыстарын насихаттауға бағытталған жобаларымен де таныстырды.