Алматыда Қытайдан тауар жеткізумен айналысқан Арайлым Қожамұратоваға қатысты сот үкімі шықты. Әлеуметтік желіде Айс Мұратова деген атпен танылған кәсіпкер алаяқтық және қылмыстық жолмен алынған ақшаны заңдастыру баптары бойынша кінәлі деп танылды, деп хабарлайды Aqshamnews.kz тілшісі КТК арнасына сілтеме жасап.
Тергеу мәліметінше, ол әлеуметтік желі арқылы Қытайдан жиһаз, тұрмыстық техника мен ыдыс-аяқты көтерме бағамен жеткізіп беруге уәде еткен. Негізінен бөлшек саудамен айналысатын кәсіпкерлермен жұмыс істеген. Клиенттер тауар үшін ақшаны оның және туыстарының шоттарына аударып отырған.
Іс бойынша жалпы шығын көлемі 4,5 миллиард теңгеден асқан. Жәбірленуші ретінде 290 адам танылды.
Сот процесі жарты жылдан астам уақытқа созылды. Сот Қожамұратованы 12 жылға бас бостандығынан айырды. Алайда кәмелетке толмаған баласының болуына байланысты жаза бір жылға кейінге шегерілді. Сондай-ақ ол жәбірленушілерге келтірілген материалдық шығынды өтеуге міндеттелді.
Бұл іс бойынша тағы 12 адам 6 жылдан 8 жылға дейін бас бостандығынан айырылды. Олар әлеуметтік желі жүргізіп, клиент тартумен және қойма жұмысымен айналысқан.
Жәбірленушілер сот үкімімен келіскен.