Ақтөбеде із-түзсіз жоғалып кеткен ерлі-зайыптының мәйіті табылды, - деп хабарлайды Аqshamnews.kz тілшісі облыстық ПД баспасөз қызметіне сілтеме жасап.
40 жастағы Аманжол Алмағанбетов пен оның жұбайы Гүлжахан Шектібаева 20 қарашада Ақтөбе қаласындағы 41-разъезд аумағындағы үйінен шығып, кейін хабар-ошарсыз кеткен. Оларды іздестіру жұмыстары жүргізілген еді.
Бүгін ерлі-зайыптының екеуінің де денесі қала шетінен табылғаны хабарланды. Облыстық полиция департаментінің мәліметінше, 1986 жылы туған әйелдің денесінен зорлық белгілері анықталып, осыған байланысты қылмыстық іс қозғалған. Кейінгі жедел шаралар барысында ер адамның да денесі асылып тұрған күйінде табылған.
Қазір оқиға орнында жедел-тергеу тобы жұмыс істеп жатыр. Аумақ тексеріліп, заттай дәлелдер жиналып жатыр, тиісті сот-медициналық сараптамалар тағайындалған. Тергеу оқиғаның нақты мән-жайын анықтауға бағытталған.
Егер сізге немесе жақыныңызға психологиялық көмек қажет болса, жергілікті сенім қызметтеріне немесе 112 нөміріне хабарласыңыз!