Бүгінгі күні Қазақстанда адам папилломасы вирусына (АПВ) қарсы вакцинамен 11-13 жас аралығындағы 54,5 мыңнан астам қыз бала егілді.
Қазан айының басынан бастап еліміздің әр өңірінде жатыр мойны обырының негізгі қоздырғышы болып табылатын адам папилломасы вирусына (АПВ) қарсы 11 жастағы қыздарға вакцинация жүргізілуде. Сонымен қатар, 12-13 жастағы қыздарға қосымша иммундау шаралары да өткізіліп жатыр.
Өңірлер арасында АПВ-ға қарсы вакцинация бойынша Түркістан облысы көш бастап тұр. Бұл аймақта 11,1 мыңнан астам қыз бала егілді. Шымкент қаласында – 5,3 мың, Қарағанды облысында – 4,3 мың, Жамбыл облысында – 4 мың, Астана қаласында – 3,7 мыңнан астам қыз балаға вакцина егілді.
Вакцина алғандар арасында иммундаудан кейінгі жағымсыз әсерлер тіркелген жоқ.
Қазақстанда екпелер мектептердегі медициналық кабинеттерде ата-аналардың немесе заңды өкілдердің келісімімен жүргізіледі. Қажет болған жағдайда ата-аналардың өтініші бойынша тіркелген жері бойынша емханаларда да вакцинация жасалады.
- АПВ-ға қарсы профилактикалық вакцинация жатыр мойны обыры және басқа да онкологиялық аурулардың алдын алуға көмектеседі.
- Қазақстанда жатыр мойны обыры барлық жастағы әйелдер арасында сүт безі обырынан кейінгі екінші, ал фертильді жастағы (25-44 жас) әйелдер арасында сүт безі обырынан кейінгі өлімнің екінші себебі болып табылады.
Қосымша және сенімді ақпарат алу үшін egu.kz сайты сияқты ресми дереккөздерді, ҚР Денсаулық сақтау министрлігінің Санэпидбақылау комитетінің, Ұлттық қоғамдық денсаулық сақтау орталығының және денсаулық сақтау басқармаларының ресми парақшаларын пайдалануға кеңес береміз.
Сондай-ақ, 7701 колл-орталығы жұмыс істейді. Бұл орталық арқылы АПВ-ға қарсы вакцинация және басқа да вакцинацияларға қатысты сұрақтарға жауап алуға болады.