Алматылық гинеколог қыздарға адам папиллома вирусына қарсы екпе салудың маңыздылығын түсіндірді
Қазақстанда қыркүйек айында ата-анасының келісімімен 11 жастағы қыздарды адам папилломавирусына (АПВ) қарсы егу науқаны басталады.
АПВ вакцинасы әсіресе қыздар үшін өте маңызды, себебі ол жатыр мойны обыры мен вируспен байланысты басқа да ісіктердің дамуын болдырмайды. Вакцина жыныстық белсенділікке дейін енгізілген жағдайда, ең тиімді болып табылады және АПВ-нің ең қауіпті түрлерінен 100%-ға жуық қорғауды қамтамасыз етеді.
Сонымен қатар, вакцинация жыныстық сүйелдердің және басқа жыныстық жолмен берілетін аурулардың қаупін азайтады.
«Адам папиллома вирусының 100-ден астам түрі бар, бірақ олардың барлығы онкогенді емес. Ең қауіпті түрлері, мысалы, 16 және 18, жатыр мойны және басқа да қатерлі ісіктердің шамамен 70%-ын тудырады. 6 және 11 типтері жыныс мүшелерінің сүйеліне әкелуі мүмкін, олар қатерлі ісік сияқты қауіпті болмаса да, өте ыңғайсыз және қайталама инфекцияларға әкелуі мүмкін. Жоғары онкогенді қаупі бар АПВ басқа түрлері де қатерлі ісік тудыруы мүмкін, бірақ сирек кездеседі», - дейді N11 қалалық емханасының гинекологы Адилям Махамед.
Осылайша, АПВ вакцинациясы жыныстық белсенділіктің басталуына дейін тиімді болатын және вирустың жоғары онкогенді түрлерінен қорғайтын негізгі профилактикалық шара болып табылады.