Қаладағы көрме 2 аптаға созылады
Абайдың өзі ұстаған домбырасы, кісе белбеуі мен Құнанбайдың Меккеге киген тақиясы. Осындай құнды жәдігерлер бүгін ұлы ақынның туған жері Семейден әкелініп, Алматы музейіне қойылды, деп хабарлайды Almaty-akshamy.kz Almaty.tv-ге сілтеме жасап.
Экспонаттарды көпшілік «Абай мұрасы – халық қазынасы» атты көшпелі көрмеде тамашалай алады. Абайдың «Жидебай-Бөрілі» мемлекеттік тарихи-мәдени және әдеби-мемориалдық музей-қорығы алматылықтар үшін 50-ден аса тарихи жәдігер алып келіпті.
Абай туған, жер кіндігі – Жидебайдан бүгін арнайы Алматыға жылжымалы көрме келді. Шығыстан алғаш рет ат арылтқан көрмені қала әкімдігі мен зиялы қауым өкілдері салтанатты түрде ашып берді.
«Жастарға керек. Өйткені бұл кісілелердің сөзі, ойы, тереңдігі біз үшін ауадай қажет. Сондықтан мен өте бүгін бақыттымын. Осынша адам Жидебайдың рухани суатынан дәм татып жатыр», – деді жазушы, Халықаралық абай клубының президенті Роллан Сейсенбаев.
Семейден ақынның өзі пайдаланған заттары мен кітаптары, қолжазбалары, жалпы алғанда 52-ге тарта жәдігер әкелініпті.
Үш ішекті домбыра мен сыбызғы Абайдыкы деседі. Бұл қойылғаны көшірмесі екен. Тұпнұсқасы Семейде. Ал мынау ақынның кісе белбеуі. Бұл теңдессіз жәдігерлерді кезінде Абай өзінің досы Николай Долгополов арқылы 1885 жылы Семейдегі өлкетану музейіне тапсыртқан екен. Кейіннен 1940 жылы Абай музейі ашылып, сол жаққа өткізіліпті.
Бұдан бөлек Абай музейінен ақынның екінші жары Әйкерімнің қобдишасы да жеткен. Ағаш пен әшекей тастардан жасалған тұпнұсқадағы сандықша әуелгі күйін әлі жоғалтпапты. Ал әкесі Құнанбайдың нақ өзінен екі жәдігер қалған десек, соның бірі – жеке мөрі, екіншісі – тақиясы.
«Сонымен қатар ең бір құнды жәдігеріміз Абайдың әкесі Құнанбайдың Меккеге барғанда киген тақиясы. Бүкіл халық Семейге бара бермейді ғой. Сондықтан да бұл қала тұрғындарына Абай елімен танысуға болады», – деді Абайдың «Жидебай-бөрілі» мемлекеттік тарихи-мәдени және әдеби-мемориалдық музей-қорығының» жетекші ғылыми қызметкері Нұржан Боранбаев.
«Абайдың музейі Алматы қаласының музейіне алғаш рет келуі. Көрме 2 аптаға созылады. Барлық қала тұрғындары мен қонақтарын осы көрмені тамашалауға шақырамыз. Күнделікті таңғы 10.00-ден 19.00-ге дейін есігіміз айқара ашық», – деді «Алматы қаласы музейлер бірлестігі» КМҚК директоры Ләззәт Сағындықова.
Көшпелі көрме бұған дейін Нұр-Сұлтан, Орал, Қарағанды, Петропавл қалаларында ұйымдастырылыпты. Алдағы уақытта өзге де өңірлерде жалғаспақ.