Аqshamnews.kz редакциясы "Күн саны" айдарында аптаның ең маңызды деректеріне шолу жасады.
Әлем чемпионаты: 10 медаль, оның жетеуі - алтын
Қазақстан құрамасы Ливерпульде өткен бокстан әлем чемпионатында 10 медаль жеңіп алды, оның жетеуі - алтын. Нәтижесінде отандастарымыз жалпыкомандалық есепте бірінші орынға жайғасты (жеті алтын, бір күміс және екі қола).
Қазақстан құрамасы әлем чемпионатын жеті алтын медальмен аяқтады:
- Бірінші орын иеленгендер: Алуа Балқыбекова (51 келіге дейін), Санжар Тәшкенбай (50 келіге дейін), Махмұд Сабырхан (55 келіге дейін), Аида Әбікеева (65 келіге дейін), Наталья Богданова (70 келіге дейін), Төрехан Сабырхан (70 келіге дейін), Айбек Оралбай (90 келіден жоғары) .
- Назым Қызайбай (48 келіге дейін) күміс жүлдегер атанды. Виктория Графеева (60 келіге дейін) мен Елдана Тәліпова (80 келіден жоғары) қола жүлде еншіледі.
200-ден аса жобаға 1,2 трлн теңге бөлінеді
Қазақстанда үш жылдық кезеңде жалпы сомасы 1,2 трлн теңге болатын 200-ден аса жоба қаржыландырылатын болады. Бұл туралы премьер-министрдің орынбасары – ұлттық экономика министрі Серік Жұманғарин Мемлекет басшысының Жолдауын жүзеге асыру жөніндегі Жалпыұлттық жоспарды таныстыру кезінде хабарлады.
Агроөнеркәсіптік кешендегі инвестицияларға тапсырыс" бастамасы аясында 5%-дық жеңілдетілген кредит беру бағытын кеңейту жоспарлануда, ал "Даму" қоры агробизнестің қарыздарына 80%-ға дейін кепілдік беретін болады.
Қазақстандағы ең жоғары зейнетақы - 993 мың теңге
2025 жылғы 1 тамыздағы жағдай бойынша Қазақстанда жас бойынша берілетін айлық орташа төлем – небәрі 35,7 мың теңге. Дегенмен, ең жоғарғы сомаға шектеу қойылмаған, кейбір азаматтардың зейнетақысы 900 мың теңгеден асады.
Қазақстандағы ең жоғарғы 5 зейнетақы төлемі (2025 жылғы 1 қыркүйекке):
-
993 041 теңге
-
818 818 теңге
-
635 236 теңге
-
565 857 теңге
-
560 437 теңге
Мектеп маңындағы бағдаршамдар мен жол белгілері
Ішкі істер министрінің орынбасары Игорь Лепеха Үкімет отырысында білім беру нысандарының маңына қажетті жол инфрақұрылымдарын орнатуды қадағалау жұмыстары туралы баяндады. Ол бұл мәселе ерекше бақылауда екенін атап өтті.
Мектептердің маңында 54 жаяу жүргіншілер бағдаршамы, 1 мыңнан астам жасанды кедергі, 8 мыңға жуық жол белгісі мен ақпараттық панно, 180 шақырым қоршау орнатылып, 248 автотұрақ салынған.
"Алайда, республика бойынша әлі де 70 реттелетін жаяу жүргіншілер бағдаршамы, 350-ге жуық жасанды кедергі және 400 жол белгісі қажет", — деді Игорь Лепеха.