28 қаңтарда Президенттің төрағалығымен Үкіметтің кеңейтілген отырысы өтеді
28 қаңтарда Қазақстан Республикасының Президенті Қасым-Жомарт Тоқаевтың төрағалығымен Үкіметтің кеңейтілген отырысы өтеді, деп хабарлайды Aqshamnews.kz
Отырыс барысында елдің әлеуметтік-экономикалық дамуы, қаржы тұрақтылығы, ұлттық экономиканың маңызды бағыттары, сондай-ақ мемлекеттік бағдарламалардың орындалу нәтижелері талқыланады. Қазіргі экономикалық ахуалға байланысты азаматтардың әл-ауқатын арттыру, инфляцияны бақылау және инвестициялық тартымдылықты күшейту мәселелері күн тәртібіне қойылады.
Отырыста Премьер-Министр Олжас Бектенов, Ұлттық банк төрағасы Тимур Сүлейменов, сондай-ақ бірқатар өңір әкімдері баяндама жасайды деп жоспарлануда.
Кеңейтілген отырыс барысында мемлекеттік органдардың жұмыс нәтижелері жан-жақты талданып, нақты баға беріледі. Жыл басындағы мұндай форматтағы жиындарда маңызды шешімдер қабылданатыны белгілі. Осыған байланысты, кейбір министрліктер мен өңір әкімдіктерінде кадрлық өзгерістер болуы мүмкін деген болжамдар бар.
Мемлекет басшысы алдыңғы кеңейтілген отырыстарда нәтижесіз жұмыс істеген мемлекеттік органдар мен лауазымды тұлғаларды сынға алған еді. Бұл жолы да нақты тапсырмалар мен қатаң талаптар қойылып, мемлекеттік органдардың жауапкершілігі күшейтілуі мүмкін.
Қоғамда кейбір министрліктер мен әкімдіктердің қызметіне қатысты сындар айтылып жүргенін ескерсек, Президенттің осы бағытта кадрлық өзгерістер енгізуі ықтимал. Сонымен қатар, Үкіметтің жұмысын оңтайландыру мақсатында жаңа бастамалар мен реформалар жариялануы мүмкін.
Үкіметтің кеңейтілген отырысы мемлекеттік басқару жүйесін жетілдіруге, экономикалық тұрақтылықты қамтамасыз етуге және азаматтардың өмір сүру сапасын арттыруға бағытталған нақты шешімдер қабылдауға негіз болады. Алдағы отырыс кадрлық ауыс-түйістер мен жаңа реформалардың бастамасы болуы ықтимал.