Тәуелсіз Қазақстанның тұңғыш Қорғаныс министрі, Қазақстанның мемлекет және әскери қайраткері, Кеңес Одағының Батыры, №1 Халық Қаһарманы, армия генералы Сағдат Қожахметұлы Нұрмағамбетовтің 100 жылдық мерейтойына орай 28 гвардияшы-панфиловшылар саябағында салтанатты іс-шара өтті.
«Офицерлер одағы» ҚБ ұйымдастырумен өткен салтанатты іс-шара барысында Сағдат Нұрмағамбетовқа құрмет көрсетіліп, «Мәңгілік алауға» гүл шоқтары қойылды. Іс-шараға ҰОС қатысушылары мен тыл еңбеккерлері, «Офицерлер одағы» ҚБ өкілдері, ҚР Қарулы Күштерінің ардагерлері және қала тұрғындары қатысты.
- Сағдат Нұрмағамбетовтың еңбегі мен ерлігін дәріптеу мақсатында үлкен жұмыс атқарылып жатыр. 2017 жылы оның қола бюстін Мәскеудің Орталық мұражайының Даңқ залына қойылды. Жеке өзін еске алатын болсам, ол өз жауынгерлерін жақсы көретін. Бізге қамқор болатын, полк командирлерінің әрқайсысын жеке-жеке аты-жөнімен танитын. Өзі казармаларды аралап, сарбаздардың жай-күйімен танысатын. Қазақстан Қарулы күштерінің қайсысы қай жерде екенін толық білетін. Көптеген әскери бөлімдері өзі жеке ашты. Сағдат Нұрмағамбетовтың басшылығымен ауыр кезеңде еліміздің әскерін сақтап қалдық және оны әрі қарай дамыта алдық, – деді «Офицерлер одағы» ҚБ төрағасы, генерал-майор Махмұт Телегусов.