Жаңа жыл қарсаңында жолаушыларға 2,5 мыңнан астам жолсерік қызмет көрсетеді.
Сондай-ақ, жаңа жылды 80 пойыз бастығы жұмыс орнында қарсы алады. Бүкіл Қазақстан бойынша мереке түнінде 135 вокзал кассасы және кассалық пункттердің 162 қызметкері жұмыс істейтін болады, деп хабарлайды аlmaty-akshamy.kz «Жолаушылар тасымалы» АҚ баспасөз қызметіне сілтеме жасап.
Он алтыншы Жаңа жылды жолаушылар пойызының жолсерігі Меруерт Қорабаева доңғалақтардың соғуымен қарсы алады. Оның бұл қызметтегі еңбек өтілі 18 жыл.
«Мереке күндері теміржол үзіліссіз жұмыс істейді. Жаңа жылға қарай жолаушылар саны көбейеді. Түн ортасында біз бір-бірімізді және жолаушыларды Жаңа Жылмен құттықтаймыз, осылайша жолда бір үлкен отбасына айналамыз. Біз жолаушының баратын жеріне аман - есен жетуі және отбасының жанында болуы үшін қолдан келгеннің бәрін жасаймыз», - дейді жолсерік.
Биыл ауа-райының қолайсыздығына байланысты мереке күндері теміржол үшін қиын болды. Екі күн ішінде жолаушылар пойыздары 4 мыңға жуық адамды эвакуациялады. Жолаушылар тасымалы қызметкерлері қолайсыз ауа-райы кезінде қауіпсіз тасымалдауды барынша қамтамасыз етті. №6805 электр пойызының аға жолсерігі Нұрсәуле Қартабаева демалыс күні әріптестеріне көмек көрсету үшін жұмысқа шығып отыр.
"Біздің жұмысымызда әртүрлі жағдайлар болады. Біз әрқашан тәуліктің кез келген уақытында жұмысқа шығуға дайын жүруіміз керек. Біз үшін жолаушыларымыздың қауіпсіздігі мен жайлылығын қамтамасыз ету маңызды", - деп бөлісті ол.
«Жолаушылар тасымалы» АҚ-ның барлық құрылымдық қызметтері жолаушылардың жайлы және қауіпсіз саяхатын қамтамасыз ету үшін жұмыс істеуде.