Алматыда 25–26 ақпан күндері «Көктем-2026» республикалық командалық-штабтық оқу-жаттығулары өтеді, – деп хабарлайды aqshamnews.kz тілшісі.
Осыған байланысты 25 ақпанда сағат 11:00-де қалада халықты құлақтандыру жүйесіне техникалық тексеру жүргізіледі. Бұл туралы Алматы әкімдігі хабарлады.
Әкімдіктің мәліметінше, тексеру барысында «Барлығыңыздың назарыңызға!» дабыл сигналы бойынша қала аумағында сиреналар қысқа уақытқа қосылады. Сонымен қатар сынақ хабарламасын тарату үшін теле- және радиоарналарды уақытша үзу жүйесі іске қосылады.
Қала тұрғындарынан сабыр сақтап, дабыл дыбысын естіген жағдайда теледидарды немесе радионы қосып, ресми интернет-ресурстар мен мобильді қосымшалардағы ақпаратты тексеру сұралады. Ресми хабарламада берілетін нұсқаулармен мұқият танысып, соған сай әрекет ету қажет екені ескертілді.
Алматы әкімдігі «Барлығыңыздың назарыңызға!» сигналы төтенше жағдай қаупі төнген немесе туындаған кезде шұғыл ақпарат таратудың алдында халықтың назарын аудару үшін берілетінін нақтылады.
Оқу-жаттығу аясында қаланың барлық ауданында өзен арналары мен арық жүйелерін тазарту бойынша профилактикалық іс-шаралар жүргізіледі. Әкімдік қазіргі уақытта су тасқыны жағдайы бақылауда екенін, жедел қызметтер алдын ала қажетті шараларды атқарып жатқанын мәлімдеді.
Сондай-ақ дайындық жұмыстары аясында қала аумағынан 150 мың текше метрге жуық қар шығарылғаны хабарланды.