Алғаш рет несие алатындарға онлайн кредит берілмейді
2025 жылдан бастап қаржы саласындағы ережелер күшейтілді. Енді алғаш рет несие алуды жоспарлаған азаматтар банктер мен микроқаржы ұйымдарынан (МҚҰ) онлайн кредит ала алмайды. Олар міндетті түрде қаржы ұйымының кеңсесіне барып, жеке тұлғамен несие рәсімдеуі қажет, деп хабарлайды aqshamnews.kz
Бұл өзгерістер не үшін енгізілді?
Қаржы нарығын реттеу және дамыту агенттігі (ҚНРДА) қаржылық және киберқауіпсіздікті арттыру мақсатында несие беру талаптарын қатаңдатуда. Онлайн несие беруді шектеумен қатар келесі шаралар да қолға алынады:
- 21 жасқа толмағандар мен 55 жастан асқандар үшін несие алу үшін қосымша келісім алу қажет;
- SIM-карталарды сатуға шектеулер енгізіледі;
- Міндетті биометриялық сәйкестендіру енгізіледі;
- Алаяқтықпен күрес мақсатында байланыс операторлары антифрод жүйелерін құрады;
- SIM-бокстарды пайдалануға қойылатын талаптар қатаңдатылады.
Тағы бір маңызды өзгеріс
Онлайн тұтынушылық несие рәсімдеуде 24 сағаттық «ойлану мерзімі» енгізіледі. Яғни, банк несие беруді мақұлдағанымен, клиент ақшаны тек бір тәуліктен кейін ғана ала алады.
Бұл өзгерістер не үшін қажет?
Руслан Омаров, Бірінші кредиттік бюро директоры:
- Алаяқтықты азайту – алаяқтар несие рәсімдеп, жылдам шешіп алып, өз шоттарына аудармауы үшін.
- Лудомандарды шектеу – құмар ойындарға тәуелді адамдардың шұғыл ақша алу мүмкіндігін азайту.
- Азаматтарға ойлануға уақыт беру – көпшілік несиені эмоциямен алады, сондықтан олар осы өзгерістер арқылы ойланып, салыстырып, шешім қабылдай алады.