Ақтөбеде интернет-алаяқтық схемасына қатысы бар деген күдікпен 25 жастағы ер адам ұсталды, деп хабарлайды Aqshamnews.kz тілшісі.
Ішкі істер министрлігінің мәліметінше, күдікті киберполиция қызметкерлері жүргізген жедел-іздестіру шаралары барысында анықталған. Ол көрші елге ірі көлемдегі қаражатты алып өтпек болған сәтте шекарада қолға түскен. Тінту кезінде одан үш жәбірленушіден алынған 20 миллион теңге тәркіленді. Күдікті уақытша ұстау изоляторына қамалып, мінген автокөлігі коммуналдық тұраққа қойылды.
Алдын ала дерек бойынша, Ақтөбе қаласының тұрғыны қала аумағындағы «дропперлердің» жұмысын үйлестіріп, қылмыстық жолмен алынған қолма-қол ақшаны тасымалдаумен айналысқан.
Полицияның айтуынша, үш азамат Instagram желісіндегі жалған жарнамаға сеніп, ірі компания атын жамылған алаяқтарға инвестиция салған. Ақша «дропперлердің» есепшоттарына түскеннен кейін қолма-қол ақшаға айналдырылған.
Қазіргі таңда сотқа дейінгі тергеу жүргізіліп, қылмысқа қатысы бар өзге тұлғалар анықталуда.