Астанадағы жеке стоматология клиникасында 3 жастағы қыздың өліміне қатысты сот процесі жалғасып жатыр. Марқұмның әкесі сотта сөйлеп, дәрігерлердің қыздың 18 тісін бір сеанста емдеуге шешім қабылдағанын мәлімдеді, деп хабарлайды Аqshamnews.kz тілшісі.
Қайғылы оқиға 2024 жылғы 30 қазанда болған. Әкесі Талғат Құмаровтың айтуынша, қызы 3,5 сағатқа созылған наркоздан кейін оянбаған. Процедура бастапқыда үш сағатқа жоспарланған.
«Мен дәрігерден 18 тісті бірден емес, алдымен тоғызын, қалғанын кейін емдеуге бола ма деп сұрадым. Бірақ бізге бәрін бірден жасау керек деді. Седация бала ауруханадан шыққаннан жеті ай өткен соң жасалды. Егер жақында, бір-екі ай бұрын болса, мұндай ұзақ наркозға келісім бермес едік», – деді ол.
Қыздың өкпесі пневмониядан кейін толық жазылмағаны анықталған. Медициналық және фармацевтикалық бақылау комитетінің сараптамасы клиниканың баланың жағдайын дұрыс бағаламағанын көрсеткен.
Іс бойынша басты айыпталушы Dent Park Ohno клиникасының анестезиологы - Аида Жұмағалиева. Ал стоматолог сотқа қатыспаған. Тергеу ҚК-нің 317-бабы 3-бөлігі («Медициналық қызметкердің кәсіби міндетін тиісінше орындамауы, адам өліміне әкелуі») бойынша жүргізіліп жатыр.
Айыпталушыға төрт жылға дейін бас бостандығын шектеу немесе айыру, сондай-ақ үш жылға белгілі лауазымдарды атқаруға тыйым салу жазасы қарастырылған.
25 қарашада прокурор сараптама қорытындыларын оқып, құжаттардан бірнеше заңбұзушылық анықталғанын мәлімдеді. Атап айтқанда, стоматологиялық картаның болмауы, келісімнің дұрыс рәсімделмеуі, консультация жазбаларының жоғы, видеоматериалдардағы сәйкессіздіктер, диагноздардың нақты қойылмауы және кейбір қолданылған препараттардың тіркелмеуі көрсетілген.