№175 гимназияның 10–11 сынып оқушыларына Алматы қалалық терроризмге қарсы күрес жөніндегі жедел штабы ұсынған арнайы дәріс сабағы өткізілді. Іс-шараның мақсаты – оқушылардың қауіпсіздікке қатысты білімін арттыру және терроризмнің алдын алу бағытында түсіндіру жұмыстарын жүргізу.
Дәріс барысында оқушыларға террористік сипаттағы қауіп-қатерлердің алдын алу жолдары, төтенше жағдайларда дұрыс әрекет ету тәртібі және күдікті жағдайлар туындаған кезде сақтық шараларын сақтау қажеттілігі кеңінен түсіндірілді. Сонымен қатар терроризмге байланысты құқықбұзушылықтар үшін көзделген заңдық жауапкершілік туралы маңызды мәліметтер берілді.
Мамандар оқушыларға жалған ақпарат таратудың, әсіресе жарылғыш заттар туралы көрінеу жалған хабарлама жасаудың ауыр құқықтық салдары бар екенін атап өтті. Мұндай әрекеттер үшін Қазақстан Республикасы заңнамасына сәйкес қылмыстық жауапкершілік қарастырылатыны ескертілді.
Аталған дәріс оқушылардың құқықтық сауаттылығын арттырып қана қоймай, олардың қауіпсіздік мәдениетін қалыптастыруға және кез келген қауіп-қатерге саналы түрде қарауына ықпал етті.